.
×

Në pritje të qeverisë së re, po shemben kullat e Jasharëve në Prekaz



Objektet në kompleksin “Adem Jashari” janë në gjendje jo të mirë, ende s’ka filluar asnjë ndërhyrje në to. Kjo pamje është e zakonshme në Kompleksin Memorial “Adem Jashari” në Prekaz. Vizitorë të shumtë, kryesisht familjarë janë vizitorë të shpeshtë të këtij vendi historik.Ata që e vizitojnë Prekazin, thonë se kjo është një formë respekti për ata që u bën themel i shtetit të Kosovës.

Praninë e shumtë të vizitorëve e konfirmon edhe ciceroni Xhevat Imeri, ai që ka qëndruar këtu përditë, për vite me radhë.

Por edhe dëmtimet dhe gjendja jo e mirë e objekteve në këtë kompleks, kanë filluar të shndërrohen në imazhe të zakonshme.

Busti i komandantit Adem Jashari, i cili është punuar vullnetarisht nga një skulptor tashmë është dëmtuar.

Pos tij, kullat vazhdojnë të rrezikohen nga shembja, pasi dy dekada pas ngjarjes së rëndë në familjen Jashari, ata kanë mbetur të paprekura.

E kështu edhe pritet të ndodhë. Fillimi i restaurimit apo konsvermimit të këtyre objekteve nuk pritet të ndodhë as këtë vit.

Nga Agjencioni për Menaxhimin e Memorialeve thonë se asnjë procedurë nuk mund të zhvillohet derisa formohet qeveria e re.

Bislim Zogaj sqaron edhe arsyen pse nuk është intervenuar në rregullimin e bustit. Qeveria vetëm në fillim të vitit 2019 pati ndarë 300 mijë euro për fillimin e punëve në këtë memorial.

Ndërkohë komiteti I ri ndërministror do të vendos për hartimin e një projekti të ri apo jo, kostoja e të cilit planifikohet të jetë rreth 6 milionë euro dhe për hartimin e të cilit nevojitet më shumë se 1 vit kohë.